Kristinn Ásgeir Gylfason var kosinn meðstjórnandi í stjórn Brúar á aðalfundi félagsins þann 9. apríl sl. Kristinn er lögfræðingur að mennt og á hann ráðgjafafyrirtækið Scaling Legal ehf. sem veitir sprotafyrirtækjum sérsniðna lögfræðiþjónustu. Áður starfaði hann hjá Sidekick Health þar sem hann öðlaðist góða reynslu í lögfræðilegum málefnum og persónuverndarmálum. Að auki hefur hann haldið utan um samningagerð og margt fl. Kristinn er einnig að læra húsasmíði. „Ég bauð mig fram til stjórnarsetu í Brú, fyrst og fremst til að standa vörð um hagsmuni félagsfólks og þá sérstaklega vil ég tala röddu einyrkja og stjórnenda í litlum fyrirtækjum. Ég veit að það hefur gengið vel hjá stjórn Brúar en eins og alls staðar er þarft að taka inn nýja rödd reglulega. Það er hlutverk sem ég er stoltur að taka að mér. Ég vil leggja áherslur á gott samband félagsfólks við stjórn og faglega stjórnarhætti sem einkennast af virku gagnsæi,“ segir Kristinn . Kristinn er frábær viðbót í stjórn Brúar og bjóðum við hann hjartanlega velkominn til okkar og hlökkum til samstarfsins.